Dieterich, Veit - Summaria christlicher Leer - Am Sontag Sexagesima/ vom Samen der eins theyls an weg/ ein theyls auff das felsicht/ vnd eins teyls vnter die dorn fellet/ Luce am 8.
DEr Same auff dem guten lande/ sind die das wort hören/ vnd behalten inn einem feinen gutten hertzen/ vnnd bringen frucht inn gedult.
MIt disem gleichnuß/ vom Same zeigt der Herr an/ was die vrsach sey/ dz Gottes wort nicht allenthalb frucht bringt/ Nemlich/ dz der mangel nit am wort/ sonder an dem hertzen/ vnd darnach am Sathan sey/ Etliche haben leichtfertige vnachsame hertzen gegen das wort/ den mag der Teuffel leicht etwas in weg werffen/ so ist der predigt gar vergessen/ Etliche sind blöd vnd zart/ wöllen nichts vmb des worts willen leyden/ noch wagen/ Etliche lassen inen gelt vnd gut so sehr lieben/ das sie des worts nit warten mögen/ darumb bleibt die frucht bey solchen hertzen aussen. Aber wo die hertzen fein achtsam sind/ vnnd Gottes wort fleissig hören/ vnd gewenen sich zur gedult/ das sie etwas leyden/ vnd lassen die weltsorg sich nit vberwachsen/ noch das hertz inen gar einnemen/ da wirt die rechte frucht/ Nemlich/ glaub vnd lieb/ vnd darnach das ewige leben folgen. Darumb lerne ein yeder Christ sich also gegen das wort schicken.
Gebet.
HErr Gott himlischer Vatter/ wir dancken dir/ das du dein liebes wort/ durch deinen Son Christum Jesum vnter vns hast außgeseet/ Vnnd bitten dich/ du wöllest durch dein heyligen Geyst vnsere hertzen dermassen zubereyten/ das wir solches wort mit fleyß hören/ vnd in eim feinen guten hertzen behalten/ vnd in gedult frucht bringen/ das wir der sünde nit nachhengen/ sie durch dein hilff dempffen/ vnnd inn allerley verfolgung deiner gnad/ vnd ewigen hilffe/ vns gewiß trösten vnd hoffen/ AMEN.