Dieterich, Veit - Summaria christlicher Leer - Am Sontag zu Mitfasten wie der Herr Christus fünfftausent Man/...
… weyb vnnd kind nicht mit gerechnet/ mit fünff brodten vnd zwen fischen speyset/ vnd zwölff körb vberblieben/ Johan. 6.
VNser Herr Jesus nam die brodt vnd dancket/ vnnd gab sie den Jüngern. Die Jüngern aber/ denen die sich gelägert hetten/ Desselben gleichen auch von den Fischen/ wie vil er wolt.
DIß ist ein schöne tröstliche Histori/ das wir vns keinen mangel sollen anfechten lassen/ sonder nur allein dahin sehen/ das wir bey dem Herren Christo vnnd seim wort bleiben/ Denn so wir das thun/ ob gleich mangel fürfelt/ so wissen wir/ das vnser Herr Christus die macht hat/ es sey so wenig für der hand alß immer wöll/ so gibt er doch dauon alß vil er will/ vnnd muß durch seinen segen alles jm vnter den henden wachsen vnnd zunemen. Wo nun er seinen segen also gibt/ da soll ferner folgen/ das man jn schon auffheben/ vnd nicht vnnützlich vmbbringen soll/ wie er hie befilht/ das man die vbrigen brfocken soll auffheben. Darumb lerne yedermann diser Histori sich trösten/ vnd für dem geytz hüten/ Der selbe sihet nur nach dem grossen hauffen/ Ein Christ aber soll nach Gottes wort vnnd dem Herren Christo sehen/ vnnd alß denn hoffen er habe einen reychen Gott im himel/ der werde jn nicht lassen not leyden.
Gebet.
HErr Gott himlischer Vatter/ der du durch deinen Sun in der wüsten füfnfftausent Mann/ weyb vnnd kindd nit mitgerechnet/ nur mit fünff brodt vnd zwen fischen/ reychlich/ gespeyset hast/ wir bitten dich/ sey mit deinem segen auch gnedig bey vns/ behüte für dem geytz vnd sorgen der narung/ das wir dein Reych vnd dein gerechtigkeyt am ersten suchen/ vnd deine milte Väterliche güte in allem/ was wir zu leyb vnd seel bedürffen/ gnedigklich spüren durch Jesum Christum vnsern Herren/ AMEN.