forsahhistu unholdun
ih fursahu
forsahhistu unholdun uuerc indi uuillon
ih fursahu
forsahhistu allem them bluostrum indi den gelton indi den gotum thie im heidene man zi bluostrum indi zi geldom enti zi gotum habent
ih fursahu
gilaubistu in got fater almahtigan
ih gilaubu
gilaubistu in christ gotes sun nerienton
ih gilaubu
gilaubistu in heilagan geist
ih gilaubu
gilaubistu einan got almahtigan in thrinisse inti in einisse
ih gilaubu
gilaubistu heilaga gotes chirichun
ih gilaubu
gilaubistu thuruh taufunga sunteono forlaznessi
ih gilaubu
gilaubistu lib after tode
ih gilaubu
fater unser thu pist in himile uuihi namun dinan qhueme rihhi din uuerde uuillo din so in himile sosa in erdu. prooth unseer emezzihic kip uns hiutu oblaz uns sculdi unseero so uuir oblazem uns sculdikem enti ni unsih firleiti in khorunka uzzer losi unsih fona ubile
dat gafregin ih mit firahim
firiuuizzo meista
dat ero ni uuas
noh ufhimil
noh paum …
noh pereg ni uuas
ni … nohheinig
noh sunna ni scein
noh mano ni liuhta
noh der mareo seo
do dar niuuiht ni uuas
enteo ni uuenteo
enti do uuas der eino
almahtico cot
manno miltisto
enti dar uuarun auh manake mit inan
cootlihhe geista
enti cot heilac ….
cot almahtico du himil enti erda gauuorahtos enti du mannun so manac coot forgapi forgip mir in dino ganada rehta galaupa enti cotan uuilleon uuistom enti spahida enti craft tiuflun za uuidarstantanne enti arc za piuuisanne enti dinan uuilleon za gauurchanne