ICh bin ein guter hirt/ ein guter hirt lest sein leben für seine schaff. Ich erkenne die meinen/ vnd bin bekandt den meinen/ Wie mich mein Vatter kennet/ vnnd ich den Vatter kenne. Vnd ich laß mein leben für die Schaff.
Wir menschen alle sind wie ein armes Schefflein/ gegen eim Wolff/ Denn wir können vnns wider den Teuffel nicht schützen/ Aber vnser lieber Herr Christus sagt vnns zu/ er wölle vnser Hirt sein/ vnd sein leben für vns lassen/ das ist/ er wölle sich lassen würgen vnnd fressen/ wie am Creutz geschehen/ vnnd also vns vom todt vnnd des Teuffels Reych ledig machen/ das wir durch jn sollen kinder sein des ewigen lebens/ Denn er kennet vns/ vnd nimbt sich vnser an/ wie jn sein Vatter kennet/ das ist/ ob er vns hie gleich lest leyden/ so will er doch vns endlich selig machen. Darumb sollen wir solchen trewen Hyrten auch erkennen/ allß vnsern erlöser/ vnd seim wort gern folgen/ Denn wer disen Hyrten nicht hören/ vnnd vergebens woll ruffen lassen/ der gibt sich selb willig in fahr/ vnd ist jm ferner nicht zu helffen. Wer aber bey disem Hirten bleybt/ ob gleych der Sathan mit anfechtung vnd allerley vnglück immerdar anhelt/ der soll ewigen schutz vnd rettung haben/ wider sünd/ todt/ vnd Teuffel.
HERR Gott himlischer Vatter/ der du vnsellende menschen Vätterlich bedacht/ vnd deinen Son zum Hirten vber vns gesetzet hast/ das er nit allein mit seinem woort vns weiden/ sonder auch durch seinen schutz/ wider sünd/ todt/ vnnd Teuffel/ vns retten vnd erhalten soll/ Wir bitten dich/ gib durch deinen heyligen Geyst/ das/ gleich wie diser hirt vns kennet/ vnd vnser not sich annimbt/ wir widerumb in allerley anligen jn auch erkennen/ vns an jn halten/ hilff vnnd trost bey jm suchen vnd gewarten/ vnd seiner stimmen mit hertzen folgen/ vnd also durch jn ewig selig werden/ Amen.