ER hat seinen Engeln befolhen vber dir/ das sie dich behütten auff allen deinen wegen/ das sie dich auff den henden tragen/ vnd du deinen fuß nit an einen steyn stossest. Auf Löwen vnd Ottern wirdst du gehen/ vnd tretten auff die jungen Löwen und Drachen.
DAs der Sathan vnnd sein gantzes reich vns menschen feind sey/ vnd alle augenblick vnns nachstelle/ ob er dem leyb oder der Seelen möge schaden thun/ solches erfaren wir teglich an vns selb/ vnd andern leuten. Denn das so vil jammers vnuersehenlich sich findet/ mit kranckheyt/ mit vngewitter/ mit hagel/ mit wasser/ mit fewer/ vnd anderm/ vnd die menschen vntereinander sich so betrüben/ beschedigen/ vnd allerley vnglück stifften/ Solches alles geschicht auß des leydigen Sathans anstifften vnd treyben/ Es ist aber darumb alles dest beschwerlicher/ das der feind vns zu starck ist/ vnd wir jm nicht/ wie den leuten/ können widerstand thun/ er fragt weder nach büchssen noch schwert/ wir sindt gegen jm bloß/ er aber ist vnsichtbar/ vnd wir können jm keinen schaden mit vnser sterck oder macht zufügen. Auf das aber wir vns nit zubeklagen hetten/ als hette Gott vnser vergessen/ Sind die lieben Engel von Got dazu geordnet/ das sie vns bewachen vnd bewayren/ vnnd dem feyndt widerstandt thun/ vnd wehren sollen. Wie Dauid hie sagt/ das sie den beflh haben vns zubehüten auff allen vnsern wegen/ das ist/ allenthalb da wir in vnserm beruf gehn/ vnd auff den henden zutragen/ dz ja kein leid vns widerfare. Solchs sollen alle Christen wissen/ vnd nit allein solches beystands vnd hilff sich trösten/ vnd teglich drumb bitten/ sonder auch all jr leben darnach füren vnd anrichten/ das sie ja dises schutzes nit beraubet werden. Denn im 34. Psal. stehet das des Herrn Engel sich vmb die her legere/ die Got förchten/ Darumb wo rohe vngotförchtige menschen sind/ die in sünden ligen/ vnd nach Gotes wort nicht fragen/ bey den selben wöllen die lieben Engel nit sein. Darumb sey yederman fromm vnd förchte Got/ so wil Got behüten vnd segnen.
HERR Gott himlischer Vatter/ Wir dancken dir für deine Vätterliche barmhertzigkeyt/ das du deine liebe Engel dazu verordnet hast/ das sie auff vns sehen/ vnnd wider des leydigen Sathans fürnemen vns schützen sollen/ Vnd bitten dich/ regier vnnd füre vnsere hertzen vnnd sinn/ durch deinen heiligen Geyst dermassen/ das wir in deiner forcht vns halten/ vnnd wider deinen willen nicht thun/ vnnd also in allerley zufallenden nöten/ die zuuersicht mögen behalten/ das deine liebe Engel werden vmb vns/ vnd alles was wir haben/ einen starcken vesten zaun machen/ das weder der Sathan/ noch die arge welt einbrechen/ vnnd schaden möge thun/ auff das gleich wie durch deinen lieben Sun Christum Jhesum/ vns vnsere sünde vergeben/ vnnd das ewige leben versprochen ist/ also durch den schutz deiner lieben Engel/ leyb/ leben/ vnd alles was wir auff erden haben/ möge erhalten vnd befridet werden. Amen.