DAs Weyb tratt hinden zu des Herren Jesu füssen/ vnnd weynet/ Vnnd fieng an seine füsse zu netzen mit threnen/ vnd mit den haren jres haupts zu trücknen/ vnd küsset seine füß/ vnnd salbet sie mit köstlichem wasser. Vnd er sprach zu jr/ Dir sind deine sünd vergeben/ Dein glaub hat dir geholffen/ Gehe hin mit friden.

DEr Euangelist sagt/ diß weyblein sey ein sünderin gewest/ Weil nun der herr am ende ir disen trefflichen trost gibt/ vnd sagt/ Deine sünd sind dir vergeben/ Ist diß die fürnembste vnnd beste lehre/ das wir an jr sehen vnd lernen/ wie sie zu uergebung der sünden sey kommen. Nu sehen wir aber/ das sie mer nit thut/ denn das sie zu dem Herrn Christo kombt/ für jm sich demütiget/ vnd biterlich weynet/ mit dem vertrawen/ (wie denn der Herr hie klar anzeigt/ weyl er sagt/ Dein glaub hat dir geholffen) er werdee jr gnedig sein/ vnnd hilff beweisen. Diß ist der weg/ welchen wir auch gehn müssen/ wenn wir vergebung der sünden begeren. Im Bapstumb hat man gelehrt/ man müsse beichten/ vnd für die sünde mit sonderlichen wercken gnugthun/ der heyligen ürbit vnd verdienst suchen/ vnd kauffen/ rc. Aber es ist eytel lügen vnd verfürung. Das sol anfenglich sein/ das deine sünd dir hertzlich leyd sind/ vnnd du gentzlich im willen habest/ in sünden lenger nicht zuuerharren/ sonder dich mit Gottes hilff zu besseren. Solches sihest an disem weyblin hie/ Denn das hefftige weynen vnd seufftzen/ kombt allein daher/ das sie gern von sünden ledig wer. Darnach finde dich zu dem Herrn Christo Jhesu mit festem vertrawen/ er werde sich deiner not annemen/ vnd dir helffen/ ewie er darumb Jesus vnd ein Heyland heyst/ das er vns in sünd vnnd todt nit will lassen stecken/ das heyst aber den Herrn Christum suchen vnd finden/ wenn du sein wort mit glauben annimbst/ vnd wie er dir in der tauff/ im Abendmal/ vnd sonst zusagt/ durch seinen tod vergebung der sünden hoffest. Es soll aber auch dise frucht folgen, das du in Gottes forcht dich haltest/ vnnd für sündenn bewarest/ denn sonst wo du in sünden woltest fort faren/ würde es kein rechter ernst mit der rewe sein. Wo du aber auß schwacheyt in sünde fellest/ solt du durch die b#uß widerkeren/ vnnd von sünden ablassen.

O Jesu du Sun des lebendigen Gottes/ der du vmb der sünder willen auff erden kommen/ vnd am creutz für sie bist gestorben/ Wir bitten dich/ gib deinen heyligen Geyst inn vnsere hertzen/ das er rechte rew vnser sünden inn vns/ vnnd vestes vertrawen auff dein verdienst vnd gnad anrichte/ auff das wir vns wider die sünd vnd böses gewissen/ auffhalten/ vnnd mit der lieben Magdalena/ durch den glauben/ im fride hingehen/ dich loben/ preysen/ vnd lieben in ewigkeyt/ Amen.